FRETILIN SEI FÓ APOIO BA GOVERNU NIA PROPOSTA ATÚ RESPONDE BA SITUASAUN EMERJENSIA

Bankada FRETILIN ejizi Governu hola medidas adekuadu hasoru emerjensia no sei fo apoiu ba Governu nia proposta atu iha kapasidade no flexibilidade atu responde ba emerjensia.

Xefe Bankada Parlamentar FRETILIN iha Parlamentu Nasional Deputadu Aniceto Longinhos Guterres Lopes ejizé atu Governu hola medidas adekuadu iha kombate kontra moras COVD-19 durante debate ho governu iha plenaria Parlamentu Nasional ohin, loron-16 fulan-Marsu tinan-2020.

Deputadu Aniceto Guterres hatete katak sensibilizasaun no diseminasaun informasaun parte importante ida husi prevensaun ba moras refere.

“Ita nia prevensaun ne’e, hau hanoin importante liu para alende ita koalia karantina, ita sidadaun no ema sira ne’ebe tama no sai ita nia rain (liu husi Portu, Aeroportu no fronteira terestre).”

Ezenplu, iha Parlamentu Nasional Deputadu sira  la kaer liman maib’e fó sinál ba malu maibé iha liur, sidadaun sira hasoru malu kaer liman no balun la uza masker. “Ida ne’e hatudu katak, preparasaun ne’ebé ita nia Governu halo atu sensibliza ita nia Povu, hau hanoin seidauk diak.“

Alende ida ne’e, bankada FRETILIN mós ejizé atu Governu koopera ho nasaun sira ne’ebé mak iha kapasidade ba halo tratamentu ba moras COVID-19.

Hanesan ezemplu,  aimoruk ida ne’ebé mak dadauk ne’e kura ona pasiente COVID-19 rihun ba rihun iha China ne’e dezenvolve husi péritu sira husi Cuba, no Timor-Leste iha relasaun diak ho Cuba, ne’ebé mak governu Timor-Leste bele aproveita atu evita COVID-19 hadaet mai ita nia rain.

Atu garante governu iha poder atu responde ba kualker situasaun emerjensia sira ne’ebé bele mosu hanesan surtu moras COVID-19 no mós inundasaun foin lalais ne’e, FRETILIN sei fo apoiu ba pedidu ene’ebé governu halo mai Parlamentu atu aprova.

Governu atu hatama proposta ba altera artigu 31 lei Gestaun Finanseira, ne’ebé sei fo garantia nafatin ba saldo tizoru hodi bele antisipa kualker situasaun emergensia ne’ebé mosu, nune’e labele depende demais desizaun polítika.

Deputadu Aniceto Guterres hatete “Proposta sira ne’e importante,FRETILIN hein hela proposta sira ne’e, no ami apoiu inisiativa proposta governu ninian, para fo fleksiblidade ba Governu iha utilizasaun Doadecimu atu responde ba situasaun emerjensia ruma.”