FRETILIN Partidu Maioria PN, Alkatiri: Laiha Dalan ba EA

Partidu Frente Revolusionaria Timor-Leste Independente (FRETILIN) ne’ebé oras ne’e dadaun maioria iha Parlamentu Nasional  ho 23 kadeira, nia Sekretariu Geral Dr. Mari Alkatiri hatete, laiha dalan ba Eleisaun Antisipada tanba Timor-Leste inklui mundu agora hasoru hela krizé boot ida mak Virus Corona (COVID 19).

Sekretariu Geral FRETILIN partidu ne’ebé kadeira barak liu iha PN ne’e  husu Parlamentu Nasional, Prezidenti Repúblika , Governu, tenki koalia ba malu para bele iha orsamentu especial ida ba tempu krizé ne’e.

“Tempu agora salva povu ne’e husi moras ne’ebe atu hadaet,” dehan Mari Alkatiri

Agora, Mari Alkatiri dehan,  lalika  halai buka poder no buka kadeira agora tenki salva Povu.

“Solusaun politíka, politíka balun tenki iha juizu,labele hadau malu poder,” sublina Mari Alkatiri.

Lider politíka balun ne’ebé buka hadau deit poder, Mari Alkatiri dehan, diak liu karantina tiha para aprende ituan ituan. “Politika sira balun tenki ba halo korentina para bele aprende,” dehan Mari Alkatiri.

Importante liu agora, Mari Alkatiri hatete, tenki fó kondisoens ba Governu atu funsiona hodi bele responde ba situasaun atúal hanesan Virus Corono (COVID-19)  no inundasaun ne’ebé afeta ba komonidade sira nia hela fatin iha kapitál Dili.

Tuir Sekretariu Gerál FRETILIN Dr. Mari Alkatiri katak, tenki fó kondisoens ba Governu atu funsiona, hodi halo desiminasaun no sosializasaun no dehan ba Povu tomak para hadook an husi moras liliu virus corona no ajuda mos ema seluk dook husi moras.

“Ita hadook an husi moras no hadook moras husik ema seluk,” dehan SG FRETILIN ne’e.