Partidu CNRT ho nia aliandu preokupa liu PUDER duque Povu
nia destinu ne’ebé agora iha perigu laran tanba moras COVID-19 ne’ebé sai
preokupasaun mundial tanba hamate ema barak ona.
Hamrok no katen ba puder husi CNRT ho nia aliadu ita
nota wainhira debate urgencia ou lae altera lalais Lei Orsamentu Gestaun
Finanseira artigu 31 hodi fó biban ba Governu bele iha kondisoens finanseira
hodi responde situasaun emergencia, maibé CNRT ho nia aliandu dehan ida ne’e la
importante sira ejize fali Prezidenti Republika atu intrega Governu ba sira.
Prezidenti Bankada FRETILIN Deputadu Aniceto
Longinhos Guterres Lopes hatete, CNRT halo politíka foer ba Povu Timor-Leste
tanba Timor-Leste oras ne’e dadaun hasoru situasaun defisíl COVID-19 no
inundasaun persiza VIII Governu nia responde urgenti maibé CNRT ejizé uluk mak
poder, atu sira ukun lalais.
“Nia (Primeiru Ministru) hatama ona (karta demisaun)
hein desizaun Prezidenti Repúblika kuandu seidauk iha desizaun, VIII Governu
sei iha lejitimidade sira, agora Governu
iha hela ho situasaun emergensia ida mai, hanesan Povu, Povu husik atu mate
ga?, a nãoser ita boot sira nia hakarak mak ida ne’e, husik povu mate ba
Governu ida ne’emak orsida lori todan, ikus mai ita iha kampaiña ataka Governu,
se hanesan ne’e politika ne’e foer, halo politika ne’e at,” dehan Aniceto.
Aniceto dehan, se CNRT sei kestiona nafatin VIII Governu
nia estutu ne’e so deit tanba Primeiru Ministru hatama ona ninia demisaun maibé
CNRT dehan VIII Governu demisionaria maibé artigu ida ne’ebé hatete dehan
Governu demisinaria.
“Ita buka took, hau hanoin maluk sira (AMP defaktu
2020) iha asesora iha konsileiru , jurista sira iha Timor kalan-kalan koalia
iha Televizaun ne’e, buka sira ajuda
took iha konstituisaun ne’e iha ne’ebé (artigu) mak dehan Governu demisionariu,
para ita bele hatete katak, Governu demisionariu ne’e laiha kompetensia , laiha
autoridade para atu halo inisiativa ruma,” dehan Aniceto.
Uluk VII Governu ne’ebé mak ukun husi FRETILIN ho
PD, CNRT koalia bebeik Governu Gestaun kuandu laiha autoridade maske iha
konstituisaun mos laiha, agora CNRT kontinua kestiona estatutu Guvernu.
“Ita boot sira (CNRT) koalia hanesan ne’e, entaun
imi nia hanoin mak poder deit, imi koalia deit mak estatutu Governu pois , so
ami (imi CNRT) ukun mak bele rejolve, imi nia hanoin atu halo milagre, ema mate
tiha ona atu moris fila fali ga?, Sira (CNRT) hanoin halo milagre hodi bele
halo moris fali Povu kuandu mate (tanba COVID-19), tanba nemak sira hakarak
ukun lai, depois mak sira rejolve, so sira mak bele rejolve tanba sira mak bele
halo milagre, hau hanoin para ho politika at ne’e, politika foer ne’e, ne’e atu
estraga deit povu, favor ida hanoin lai vida povu ida ne’e nian,ukun ne’e imi bele
ba ukun maibé imi sei la halo milagre tanba ema mate tiha ona, keta maromak
ramelau ne’e mak tun ba atu hadia,” dehan Aniceto.
Aniceto dehan, CNRT ambisaun ba ukun maibé faktu
hatudu ona CNRT ukun tinan 12 ukun ne’e rejultadu laiha.
“Sistema saúde Timor-Leste ne’e saida mak iha, agora
ita ba tama sai aldeia para dehan ami mak servisu ba Povu, ne’e la rejolve buat
ida, ita so lori sistema, sistema ne’e kualker Governu kaer para hodi rejolve
problema ne’e,laos idaidak ba halo ninia karidade mak foin bele rejolve
problema,” dehan Aniceto.
Tidak ada komentar:
Posting Komentar