Mandati: Labele Dez-autoriza Ema Rezistensia

Deputadu Bankada FRETILIN, David Mandati Dias Ximenis ejizé ba AMP defaktu 2020 ne’ebé kompostu husi CNRT,PD,KHUNTO,UDT,FM,PUDD atu deklara Primeiru Ministru Taur Matan nia salah saida tanba nemak buka dalan oi-oin atu hatun nia.

“Ita ejizé , ita hanesan presiona Taur Matan Ruak, agora hau husu deit , sala saida mak barak los iha Taur Matan Ruak, para agora ita omilia nia, hau la koalia ona konaba orsamentu, ita atu buska para atu umilia hatun Taur Matan Ruak?,” Lamenta Deputadu Mandati iha Plenaria extra ordinaria ba debate urgensia ou la urgensia altera lei orsamentu gestaun finanseira (25/03/2020).

Mandati dehan, AMP 2018 ne’ebé kompostu husi CNRT,PLP no KHUNTO mak forma Governu diak hela lao too tinan rua nusa mak fó salah ba Taur Matan Ruak , Primeiru Ministru ne’ebé sira mak indizita , sira mak fó fiar.

Se membru Governu ruma iha VIII Governu ne’e nia prestasaun servisu ladiak, halo remodelasaun laos fó salah ba Primeiru Ministru Taur Matan Ruak.

“Uluk-uluk Governu bele lao hamutuk hela, depois (bele) halo remodelasaun ba Gabineti (VIII Governu),  iha nemak  semak salah hasai, mais ida ne’e (tanba samak) tenki hasai mak Taur Matan Ruak , Taur Matan Ruak ne’e salah saida?,” dehan Mandati.

Iha plenaria, Mandati ejizé atu deputadu sira husi AMP 2020 atu hatete sai Primeiru Ministru Taur Matan Ruak nia salah saida?

“Hau hakarak ema ida iha ne’e responde mai hau, Taur Matan Ruak nia salah para ita atu omilia nia, hau hakarak ida ne’e deit, hau dezafia ema hotu iha ne’e, ema ruma dehan Taur Matan Ruak nia sala ohin loron hau vota kontra kedas,”

Mandati dehan, AMP 2020 halo finji koalia orsamentu nudar estrumentu atu hatun Taur Matan Ruak atu hatun ema rezistensia sira deit.

“Hau lakohi koalia ona konaba orsamentu, orsamentu ne’e fuzitivu ita boot sira koloka, atu umilia, atu rebaixa Taur Matan Ruak, Hau hakarak dehan mai idaidak, dehan mai apa sira, hakarak umilia nia koalia lolos, ita dez-autoriza ona ema barak rezistensia ninian,” dehan Mandati.